Bókin - netbókabúð

Ræður Hjálmars á Bjargi # 46974 [Óbundin]

Verð:	1.900 kr.

Afgreiðslutími:	1-3 dagar, að jafnaði.
Tungumál:	Íslenska
Ástand:	Gott eintak.
Vörunúmer:	#46974

Innihald
Ræður Hjálmars á Bjargi fyrir börnum sínum um fremd, kosti og annmarka allra stétta, og um þeirra almennustu gjöld og tekjur. Eftir Magnús Stephensen. Örn Hrafnkelsson bjó til prentunar.
Magnús Stephensen er án efa sá maður sem hefur haft hvað mest áhrif á menningarlíf Íslendinga á áratugunum um og eftir aldamótin 1800. Fyrir utan embættisstörf sín stýrði hann um skeið helstu prentsmiðju landsins og skrifaði eða hafði afskipti af nánast allri íslenskri útgáfu veraldlegs efnis árum saman. Þessi sérstaka staða Magnúsar gerir það að verkum að höfundarverk hans hefur verið mótandi fyrir sýn síðari tíma manna á þetta tímabil.
Eitt af þekktustu verkum Magnúsar eru Ræður Hjálmars á Bjargi, fyrst gefið út í Viðey árið 1820. Þar setur Magnús fram greiningu sína á málefnum samfélagsins og boðskap sinn til þjóðarinnar. Bókin er byggð upp sem samtal föður, Hjálmars, við syni sína þrjá - og eina dóttur þegar líða tekur á bókina. Í gegnum þetta samtal gerir Magnús grein fyrir þeim þjóðfélagsstéttum sem hann taldi vera í landinu; stéttum embættismanna, presta og bænda. Hann dvelur lengst við hlutskipti bændastéttarinnar, sem þorri landsmanna tilheyrði samkvæmt skilgreiningu Magnúsar, enda bókinni ætlað að vera leiðbeinandi fyrir almenning um dyggðugt líferni og stöðu sína gagnvart yfirvöldum. Sjónum er líka beint að hlutverki kvenna í samfélaginu en dyggðir þeirra birtast í að vera góðar bústýrur og trúar manni sínum að mati Magnúsar.
Við uppskrift á texta Magnúsar hefur verið fylgt stafsetningu eins og hún er í upprunalegu útgáfunni. Þetta gefur bókinni aukið fræðilegt gildi en kann að virka fremur fráhrindandi almennum lesendum. Ásamt heldur stirðlegum stíl Magnúsar leiðir þetta til þess að það tekur óvanan nokkra stund að venjast textanum. Lesendur ættu þó ekki að láta það stöðva sig við að kynna sér ritið því hér er á ferðinni yfirgripsmikil samfélagsgreining samtímamanns.
Í ítarlegum inngagni Arnar Hrafnkelssonar er fjallað um persónu Magnúsar, þann hugmyndaheim sem Ræðurnar eru sprottnar úr og loks verkið sjálft og þær fyrirmyndir sem Magnús hafði. Jafnframt því að setja bókina og þau sjónarmið sem tekin eru þar til umfjöllunnar í sögulegt samhengi tekst Erni að varpa skemmtilegu ljósi á persónu höfundarins. Sýn Arnar á bókina og höfund hennar verður seint talin til róttækrar sagnfræði en ber þess heldur með sér yfirbragð vandaðrar fræðimennsku sem gefur greinargott yfirlit yfir þann jarðveg sem bókin er sprottin úr. Allviðamiklar útskýringar neðanmáls við texta Magnúsar eru og gagnlegar m.a. við að tengja ritið öðrum textum upplýsingaraldar.
Þetta rit Magnúsar er eitt af lykilverkfærunum til að öðlast innsýn inn í íslenskt samfélag í upphafi 19. aldar. Það er því sérlega ánægjulegt að bókin skuli nú vera endurútgefin. Ekki spillir fyrir sú natni sem Örn Hrafnkelsson hefur viðhaft við undirbúning útgáfunnar. Að ytra byrði ber hún öll merki fræðilegrar hógværðar; í kiljuformi með einfaldri forsíðu - að innan er hún til vitnis um vel unnið verk útgefenda.
Ólafur Rastrick
www.mbl.isis.

Um bókina
Reykjavík : Sagnfræðistofnun Háskóla Íslands : Háskólaútgáfan, 1999.